महाराष्टातील रत्नागिरी जिल्ह्यातील चिपळूण तालुक्यात मजरे दादर येथे "कुलस्वामिनी श्रीरामवरदायिनी" मातेचे दिव्य भव्य असे मंदिर आहे. हे मंदिर वैतरणा व पंचगंगा यांच्या संगमापासून काही अंतरावर उभारले आहे. विस्तीर्ण पठारावर उभी असलेली ही नूतन वास्तू प्रेक्षणीय असून दसपटी विभागाच्या मध्यमागी आहे..

मंदिर पूर्वाभिमुख असून मंदिरापासून काही अंतरावर पूर्वेला दिसणारी सह्याद्री पर्वताची गिरी-शिखर येथील मनमोहक वातावरणात भर घालतात. या मंदिराची स्थापना १५ व्या शतकात झाली अशी कागदोपत्री नोंद आहे. इ.स.२००१ साली या मंदिराची नूतन वास्तू उभारण्यात आली. हे मंदिर तमाम दसपटी विभागातील लोकजीवनाचे व पारंपारिक अस्मितेचे शिल्प ठरले असून येथील सांस्कृतिक, धार्मिक आणि सामाजिक उत्कर्षाचे ते मनोहर मनमोहक प्रतीक आहे. नुतन वास्तु निर्मीतीच्या वेळी संगमरवरी दगडाच्या नवीन कोरीव मूर्तीची स्थापना मंदिरात करण्यात आली.कुलस्वामिनी श्रीरामवरदायिनीच्या उजव्या बाजूला श्री महिषासुरमर्दीनी तर डाव्या बाजूला श्री वाघजाईची मूर्ती स्थानापन्न झाली आहे.